Pentsio-planen likidezia interes handiko gaia izan da aurreztaileentzat, batez ere bermatutako eskubideak 10 urtetik aurrera ahalbidetzen duten arau-aldaketen ostean. Jarraian, onura horren funtsezko alderdiak aztertzen ditugu, eta azaltzen dizugu nola lagundu diezazukeen zure finantzen kudeaketa hobetzen.
- Zer da pentsio-planen likidezia?
Pentsio-plan baten likideziaren esanahia da metatutako funtsak erretiroaren aurretik eskuratu daitezkeela, legeak ezarritako baldintza jakin batzuk betez gero. Betidanik, tresna horiek diseinatuta zeuden erretiratzeko adinera iristean soilik erreskatatzeko, edo heriotza, baliaezintasun, iraupen luzeko langabezia edo gaixotasun larriaren kasuetan. Nolanahi ere, likideziarako aukera berri bat erantsi zen: erreskatea egin ahal izatea ekarpenek 10 urteko antzinatasuna izan ondoren.
- Nola funtzionatzen du erreskateak 10 urte ondoren?
2025etik aurrera, 2015a baino lehen egindako ekarpenak eta horiek sortutako errendimenduak eskuratu daitezke. Ziklo hori urtero errepikatuko da, 10 urte lehenago egindako ekarpenak erreskatatzea ahalbidetuz. Aldaketa horrek malgutasun handiagoa eskaintzen die aurreztaileei, batez ere ustekabeei edo finantza-behar konkretuei aurre egiteko.
- Badu zerga-inpakturik?
Garrantzitsua da kontuan hartzea erreskatatutako zenbatekoak laneko errendimendu gisa daudela zergapean PFEZan. Horrek esan nahi du errentaren aitorpenean sartu behar direla, eta horrek zerga-oinarria handitu dezakeela. Horregatik, gomendagarria da erreskatea planifikatzea, zerga-inpaktua murrizteko; hala, hobe da hori egitea gainerako sarrerak txikiagoak diren urteetan.
- Garrantzitsua da erreskate-estrategia bat definitzea?
Pentsio-plan bat erretiroaren aurretik eskuratzeko aukera abantaila esanguratsua da, baina kudeaketa arduratsua ere eskatzen du. Erreskatearen unea eta forma planifikatzea funtsezkoa da onurak optimizatzeko eta alferrikako zerga-kargak saihesteko.
Laburbilduz, Pentsio-planen likideziak zabaldu egiten ditu aurreztaileen aukerak, eta haien diruaren gaineko kontrola handitzea ahalbidetzen du. Guztiz beharrezkoa da profesional bat kontsultatzea, kasu bakoitzean aurreikusitako helburuekin bat datozen erabaki informatuak hartzen lagundu dezan.
